收到PM問：英國生活質素低，點解仲留低

首先，我唔覺英國生活質素低，如果上個post令你有呢個感覺，我只能講：無一個國家係完美既，亦要調整自己適應新生活。

上個post的英國生活情景描述，從英國谷友的熱烈回應，就知道大家都有同感。每一個生活小細節總會遇到文化差異，從埋怨變成適應，係一個慢慢轉變嘅過程住不同區域又會有不同感受。

1️⃣關於能即日有GP期睇醫生

係香港，你行入（GP普通科醫生）診所，比錢就睇到醫生，通常睇傷風感冒咳&開假紙，屬於私家醫療服務，完全唔需要經過政府醫療系統。

英國GP=家庭醫生，基本上唔睇傷風感冒咳。佢係負責病人既整體健康管理，你有病，搵GP先評估&按需要轉介專科或進一步檢查，另外亦安排健康檢查,流感針，打疫苗等，當然仲有就係幫你開返長期藥物。

傷風咳，真係冇得睇？咁視乎情況啦。如果你出現發燒, 氣喘等，打去GP佢覺得有需要，都有機會比即日期你見醫生。

我哋即日有得睇既情況：

1）米爸長期病患，咳到氣促
2）心翳唔舒服，即日安排心電圖
3）尿道炎發作（最近襯自己返開香港買定
藥，一發作自己「醫」自己🙈）
4）婦科問題，安排第二日照埋超聲波
5）妹妹哮喘底，咳到氣喘

如果你想要返香港嘅方便快趣既GP服務，我只知道倫敦有&當然唔平，或者係網上嘅GP服務。

簡單病症，去藥房搵藥劑師問診後買藥，其實都好方便。

2️⃣抽血,覆診,檢查去到才知道被取消都唔會嬲

喺英國，我哋嘅經驗係每10次約抽血、覆診或檢查，大約有一至兩次會被取消。不過，我工作嘅地方情況更為明顯，院友嘅覆診被取消大約每10次有3次。好多時去到先知醫生病咗，或者無原因咁被取消，約錯日子都發生過。

如果同香港嘅效率同準確度比較，確實有落差，唯有調整自己嘅期望同要求。

3️⃣ 火車🚉delay或取消

我一年最多坐火車3、4次，主要係往來London,有一、兩次係去隔離鎮睇專科,早點出門，取消咪坐下一班。取消原因通常都係司機病咗、唔夠人手、天氣影響供電等等。

最近睇本鎮forum,有新搬入黎，每日倫敦返工嘅呻，一星期兩,三日既火車被取消，搞到返工遲大到，懷疑自己搬錯區。其他人答佢：我以前往某個鎮，都係一樣，言下之意，英國火車就係咁。

再有更實際嘅建議：自己揸車🚗返工！

3️⃣收到任何文件都一定核對,預咗一定有錯。

住得英國一段時間，越接觸得多唔同機構或部門，就實會遇到，唯有自己把關，小心啲睇清楚&禮貌地請對方改返啱，嬲係冇用，惡言相向更有機會被取消服務，總之大家都要客客氣氣，維持社會氣氛和諧。

當我唔再對人有高要求，我自己返工都會放鬆啲，我仍會保持盡量唔出錯既工作態度，呢樣係對自己&院友，應該有嘅責任。當我發現自己有錯，的確冇喺香港咁大壓力，提醒自己下次唔好再錯就得了。

每個地方都有自己文化，係香港生活咗幾十年，黎到英國一下子有落差係正常嘅，唯有自己慢慢tune in，大錯就從正常途徑提出意見/投訴，如果無改善就social media呻，平衡下自己。

～～～～～～～～～～～～～～～～～～

🩺米爸長期病跟進：香港VS英國（東南部）移英後病情穩定&生活質素提高🥰
https://methyma.blogspot.com/2024/03/vs.html

🩺英國NHS免費身體檢查，定時定候邀請你參加
https://methyma.blogspot.com/2024/09/nhs-nhs.html

🇬🇧為永居&入藉做準備
考兩個試 +搵兩個諮詢人+儲5年居留文件
bit.ly/3BQiXxu

#英國生活

#米里媽移民英國

MethyMa米里媽媽在英國